الستر ‏من ‏أقوال ‏الشعرواي ‏. ‏. ‏. ‏اقرأ

يَا أَيُّهَا النَّبِيُّ قُل لِّأَزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِن 

جَلَابِيبِهِنَّ ۚ ذَٰلِكَ أَدْنَىٰ أَن يُعْرَفْنَ فَلَا يُؤْذَيْنَ ۗ وَكَانَ اللَّهُ غَفُورًا رَّحِيمًا.

أرجو كلامى يتقرى للآخر عشان عارف إنكم مشبعين بقالكم فترة بالأحداث دى وعشان التحفز للهجوم يقل شوية لحد آخر المقال.

الشيخ الشعراوى فسر الآية وقال إنى ربنا سبحانه وتعالى أخبر النبى أن يأمر النساء بكده وده سمات المؤمنات واللى مينفذهوش ينتقص إيمانه طيب بالنسبة للتحرش بقى الشيخ برضو قال والآية واضحة أهه ذلك أدنى ان يعرفن فلا يؤذين 

معناها إنى لما البنت تطبق ده هتبقى أقل عرضة للقصص دى والناس نظرتهم ليها هتكون طبعا غير اللى بتظهر مفاتنها وده ربنا اللى ربط بين الأمرين مش حد تانى، بكرر ربنا الل ربط.

حد هيقولى إنت بتقول إنى سبب التحرش هو لبس البنات ولسا هيكمل زياطة هقوله إنت شخص مضلل وسيء لأنى كل كلامى ده مش معناه كده خالص، التحرش حاليا بيحصل لكل بنت لكن بنسب يعنى أكيد الغير محتشمة أكثر وده لا ينفى تعرض المحتشمة ليه برضو بش سعتها البنت دينيا هتبقى سليمة، المتحرش كده كده هيتسجن والمغتصب لازم يتعدم عشان يبقى عبرة لغيره وكلهم أشكال حقيرة لكن انا هنا بتكلم دينيا للبنت، أنا بتكلم عن علاقتك بربنا وأوامره مش قصة متحرش وهبررله والهبل اللى بيقنعوكى بيه، اوعى تحطى مبرر للزى الغير محترم وتقولى ما كله بيحصله كده وكله بيتحرشوا بيه اوعىىى عشان لا فيه فرق كبير عند ربنا بينك وبين واحدة نفذت أوامر الله عز وجل فهل يستويان!!!

الزمن صعب نعم وفتنه كثيرة نعم، الإغتصاب بقى مرض نعم وأشباه الرجال صارت كثيرة نعم وردعهم واجب نعم والقضاء عليهم نعمم لكن هنا كل كلامنا نصح ليكى مش أكتر وده ليه عشان فيه ناس استغلت القصص دى وبقت تبيح للمرأه إنها تروح لبيوت شباب لوحدها عادى او إنها تعمل الحرام عادى تحت مسمى الفيمينست والحرية الخادعة او الكاتبة اللى تقول أنا هروح لربنا ب لبسى ده ومش خايفة وهخاف من إيه وكمية تبجح ع الخالق شنيعة وكله بيركب التريند ومفيش غيرك هيتأذى، الناس دى مش عايزة حرية والله ولا يهمها الأمر لكن يهمهم ترسيخ فكر معين هيموتوا وكله يبقى ماشى عليه عشان تبقى زيهم وملوثة زيهم والدليل إنهم بينادوا بالحريات وفنفس الوقت بيهاجموا الحجاب وبيقولوا تخلف ورجعية.

آخر الحديث، اللبس مش السبب الرئيسى للتحرش وده صحيح، لكنه ممكن يكون سبب لناس تانى بيستغلوه لفعل حاجة قذرة زى دى فالحل ميكونش فالمكابرة والعند زى مثلا ييجى واحد يقولى إنت بتشتم وده حرام أروح بالعند أسبله وأقول إنى كده محدش يتحكم فيا لكن دى طفولة متأخرة وجهل.

أنا مش داعية ولا مؤهل لده بس عندى ثوابت فالدين بسيطة بحاول اقولها وأعيش عليها قد أفشل مرات لكن عمرى مهجاهر بذنب أبدا.

ربنا يحافظ على بناتنا جميعا والله يعلم إنى الواحد بينصح لوجه الله فقط مش أركب الموجة زى ناس وأقولك تحررى واعملى الل عايزاه والعيب ع المتحرش بس وإنتى كده صح وهلاقى بنات فرحانة بكلامى، والله اللى بيقولك كده بيضلك مش بينصحك ولآخر مرة بقول التحرش مش سببه الرئيسى اللبس والمفاتن لكن الآية ذكرت حتى فاللبس علاقته بالتحرش يعنى ربنا اللى ذكر وعايز شخص يطلع يعلى على كلام ربنا.